Luk 1 | MHL | STEP | Aria, Tiofilus, maa unowa iiriw yiar imenarek nain mua unowa nain urufap siisimemik.

Luke 1

1 Aria, Tiofilus, maa unowa iiriw yiar imenarek nain mua unowa nain urufap siisimemik. 2 Onoma-pa imenar-ikiwok naap. Maa imenarek nain mua papako-ke wiena mokok onaiya urufap maiwkin opora nain ookamik. Wi mua unowa nain Mua Maneka mauwowa-pa ikemik, ne wis-ke opora fain yiemik. 3 Naapeya yos pun nanar fain siisimep no sesekominen. Maa imenarek nain opor onoma fain kakeniw akena wia nokarep siisimiyem. 4 Naapeya no eliw amisarinan, opora nefa maakemik fain maken akena.

Yon Baptais imenarek nain opora

5 Iiriw Yuuda owow saria Erot ikowa-pa, pris oko-ko nan ikua, unuma Sekaraiya, o Abiya kerekera-ke, ne wi teeria nain tempel koora uuwow mua-ke. Ona emeria pun Aron nembesir-ke, unuma Elisabet. 6 Wiam erup Mua Maneka mokok epa-pa eliw akena ikemik. Mua Maneka sira ne opora wiar ookap sira kakeniw ikemik. 7 Nain wiam erup muuka marew ikemik, wi oram ikok panemik.

8 Ne iir oko-pa Sekaraiya wiena teeria unow onaiya mauwowa wiar kerereya tempel koora ikiwemik. Ne Mua Maneka mokok epa-pa wiena uuwow sira ookami Sekaraiya pepekimiwkin tempel koor kemena ikiwok, maa tana ikin eliwa kuumemi kawus wuowa naep. 10 Ikiwep ikaeya emeria mua unowa epa maneka-pa ikok Mua Maneka farem-ikemik. 11 Ne Sekaraiya koor kemena-pa nan ikaeya Mua Maneka ensel-ke wiar imenarek. Imenarep maa wuowa esimsa mamaiya, asow ekeria-pa wiar iimarep ikua. 12 Ensel urufap soranemi mia fufuep kema unu-unowa wuak. 13 Ne ensel-ke maakek, “Sekaraiya no me keker opa. Moram iiriw no Mua Maneka farep nokaren nain opora nefa miimak. No emeria ikoka uroma wuap muukarinon, muukareya muuk unuma Yon nae. 14 No manek akena kemelinan, ne emeria mua unowa pun kemelikuan. 15 Muuka nain Mua Maneka mokoka-pa unum maneka ikainon. Onak uroma-pa wiar ikaeya Mua Maneka Ewar Eliwa o wiar ikainon. Arimep wain eka ne eka kekanowa oko me eniminon. 16 Ikoka os-ke wi Isrel emeria mua wia maakeya kema kirep Mua Maneka ookikuan. 17 Ne profet Elaiya sira ne kekanowa saarik ikok miimep ikaeya Mua Maneka mua eena sesekowa maep-puak nain ikoka imenarinon. Sira feenap oninon, mua unowa kema wia kiripeya wiena muuka wiamiya kema eliwiw ikaikuan, ne mua opora fienimik nain, wi kema kirep mua kakeniw ikaimik nain sira wiar aawikuan. Os-ke wia kakeneya, kakenarep ikok Mua Maneka mua eena sesekowa maep-puak nain ekapowa arep ikaikuan.” Ensel-ke Sekaraiya naap maakek.

18 Naeya maakek, “Yo kamenap amisarinen, no opora fain maken-i e weetak? Moram yo emeria ikos panemik.”

19 Naeya ensel-ke maakek, “Yo ensel Gebriel-ke, yo anane Mua Maneka wameiya ikaiyem. Ona efa sesekeya opor eliwa fain nefa maakowa ekapem. 20 Aria, yo opora fain makena-ke me efar nain, naapeya no aakunowa marew naap ikok ikip emeria nefar muukareya iiwawun aakuninan,” ensel-ke naap maakek.

21 Aria Sekaraiya tempel koor kemena-pa epa ekam-ikaeya wi emeria mua o arewap ikok kema unowa wuam-ikemik, maa mauwa-ke imenareya senam akena epa ekam-ikaiya noma! 22 Naap ikok o oromi me aakunek. Aakunowa me pepek, naapeya wapeniw wia maakem-ikua. Naeya maemik, “Tempel koor kemena-pa maa onaiya-ko urufak,” naap maemik. 23 Naap ikok, Sekaraiya mauwow epa wiar weesereya, ona owowa ikiwok.

24 Naap ikok ona emeria Elisabet uroma wuak. Uroma wuap siiwa ikur koora-pa muutarep ikua. 25 Feenap maek, “Yo me muukarem-ikem nain wi unowa mokoka-pa emina ururem-ikem. Nain Mua Maneka-ke efa kemaleya uroma wuap aakisa emin ururowa efar weeserek.”

Ensel-ke Maria maakek, Yeesus ikoka imenarinon

26 Siiwa ikur Elisabet urom onaiya ikaeya Mua Maneka-ke ensel Gebriel sesekeya Galili kame owow oko ikiwok, unuma Nasaret. 27 Wiip takira eliwa oko mua pepekimep-puomamik nain wiar imenarek, unuma Maria. Mua nain unuma Yosep, ne Dewit nembesir teeria-ke. 28 Aria Gebriel-ke imenarep Maria maakek, “Amirika, Mua Maneka no nefa kookaliya.” 29 Naeya opora nain miimap samor soranep kema unu-unowa arep maek, “Opora fain kamenap nain-ke?” 30 Ne ensel-ke maakek, “Maria, no me keker opa. Mua Maneka nefa kookalep nefamiya ikaiya. 31 No ikoka uroma wuinan. Uroma wuap muukaremi muuka unuma Yeesus nae. 32 O ikoka unum maneka ikainon. Ne feenap maikuan, Iinan Mua Maneka Muuka-ke. Ne ikoka Mua Maneka-ke owow saria wuinon, iiriw ona nembesir Dewit ikua naap. 33 Yekop nembesir teeria os-ke saria wiar ikainon. Ne anane naap wia urufam-ikainon.” Ensel-ke naap maakek. 34 Naeya maek, “No naap maen nain ikoka kamenap efar imenarinon? Yo oram ikem, yo me muewem.” 35 Naeya ensel-ke maakek, “Ikoka Ewar Eliwa nefar oraeya Mua Maneka kekanowa-ke nefa wakesimeya uroma wuinan. Naapeya no muuka nain ikoka feenap maikuan: Mua Maneka o pepekimok nain-ke, ne Mua Maneka Muuka-ke. 36 Ne nena noopan Elisabet panek, nain muuka uroma-pa wiar ikua. Iiriw maem-ikemik, o muukarowa me pepek naemik, nain aakisa urom onaiya ikua. Ne siiwa ikur iiriw ikiwok. 37 Mua Maneka onowa maek nain onowa me pepek-ko me ikua.” 38 Ne Maria-ke maek, “Yo Mua Maneka uuwow emeria-ke. No maen naap eliw efar imenarinok.” Aria naap maeya piipuap ikiwok.

Maria ikiwep Elisabet urufak

39 Naap ikok iir oko Maria ona owowa piipuap ewur akena ema owowa wiar ikiwok. Ema unowa nain Yuudia kame-pa ikua. 40 Ikiwep owowa wiar fuunep Sekaraiya koora wiar ekap woopan Elisabet urufap amirika naakek. 41 Elisabet-ke Maria amirika naeya miimap muuka uroma-pa wiar ikua nain-ke patanemi galiwarek. Ne Ewar Eliwa-ke Elisabet kema iweya 42 kerewa maek, “Mua Maneka kema eliwa nieya no eliw ikon, ne no unuma nain emeria unowa wia nomakek. Muuka no uroma-pa nefar ikua nain pun Mua Maneka-ke kema eliwa iwinon. 43 Yo emeria oram-ke, ne no yena Maneka onak-ke yo efar ekapon. 44 No kererep amirika efa naeya nefa miimamkun muuka uroma-pa efar ikua nain kemelap patanemi galiwarek. 45 No emeria opor miimowa-ke, Mua Maneka nefa maakek naap oninon nain eliw naen, naapeya Mua Maneka kema eliwa niinon.”

Maria ona someka

46 Ne aria Maria-ke maek,

“Yo Mua Maneka unuma fakeriyem,
47 O efa aawow mua-ke, ne os-ke anane efa asipeya kema eliwiw ikaiyem.
48 Yo emeria oram-ke, nain ona uuwow emeria efa wuap efa kemalek. Naap oneya ikoka emeria mua unowa efa maikuan, Mua Maneka-ke kema eliwa iwok, naap efa maikuan.
49 Moram Mua Maneka kekanowa nain-ke maa maneka onomakomek, o unuma eliw akena.
50 Emeria mua o opora wiar miimimik nain wia kemaliya, wiena muuka, wiimasip ne nembesir pun naap akeniw ikiwem-ikainon.
51 Mauwowa kekanowa oniya, ne mua unowa wiena unuma wiam purupimik nain wia iirareya bauraromakemik.
52 Wi owow saria os-ke unuma wia poraiya, ne mua unum marewa nain wia fakeriya.
53 Wi mua wuailimik nain maa eliwa wieya pepek erimik. Ne mua maa unowa wiar ikomakek nain, oram wia sesekeya ikiwimik.
54 I Isrel ona uuwow mua wiar ikemik nain yia asipak, yia kemalep me yia piipuak.
55 Yiena nembesir Abraham ame wia maakek naap, ‘nena teeria ne nena nembesir teeria anane nia urufinen,’ naap maep naap oniya.”
Maria someka naap awok.

56 Aria siiwa arow nan Elisabet wameiya ikok kiiriw kirep ona owowa ikiwok.

Elisabet muukarek

57 Naap ikok Elisabet uroma yakiemi muuka muukarek. 58 Mua Maneka o kemalek nain muukareya ona owow epaskun ne ona samapora opora miimap unowiya kemelamik. 59 Ne sande kuisow ikiweya muuka mia kanima puukowa naep unowiya ekapemik. Ne ona wiawi unuma Sekaraiya iwu naep maemik. 60 Ne onak-ke maek, “Weetak, unuma Yon naiyen.” 61 Naeya maakemik, “Ni niam erup niena samapora unuma naap-ko me niar ikua.” 62 Naap maemi wapeniw wiawi nokaremik, muuka unuma kamenap farinan. 63 Ne maa siisimow maa-ko pekapomuk naep wapeniw wia maakeya pekapep iwiwkin feenap siisimok, “Unuma Yon.” Naap oneya kema unowa wuamik. 64 Naap siisimep-puap ona omaiwa wiar kakenareya kiiriw aakunemi Mua Maneka unuma fakerak. 65 Ona owow epaskun naap urufap kema tootonemik. Ne opora nain manekarep ikiwep Yuudia kame ema owow unowa wiar kerereya nain uuwunemik. 66 Mua unowa opora nain miimap kema suuwap maemik, “Muuka nain ikoka arimep mua kamenap ikainon noma?” Naap maemik. Moram Mua Maneka kekanowa o wameiya ikua.

Sekaraiya ona someka

67 Aria Sekaraiya Ewar Eliwa-ke kema iweya profet saarik maek,

68 “I Maneka unuma fakeriyen, yiena Isrel Mua Maneka. Moram ona i yia kema suuwam-ikok kiiriw yia aawok.
69 Opora iiriwiw ona profet unowa wieya wiar maemik nain aakisa makena arek. Ona uuwow mua Dewit nembesir teeria murarowa-pa imenarimik nain mua eliwa ne kekanowa iimarowak, nainiw yia aawowa nain.
71 Os-ke i iiwua ne wi mua urom meka yia onimik nain wapena-pa wiar ikemkun yia aawinon.
72 Naap onami yiena nembesir unowa wia kemalep ona opor makena ne eliwa iiriw ona wia maakep koonowak nain kema suuwap maa imenak. Opor maken akena nain iiriw yiena nembesir Abraham maakep koonowak nain.
74 Ne yiena iiwua wapena-pa yia aaweya i keker opowa marew, o kema suuwami mauwowa eliw wiar opiyen, opora wiar kema suuwami sira eliwa-pa ikaiyen, miiwa-pa feek ikok ona yia urufam-ikaeya naap onam-ikaiyen.
76 Muuka, no ikoka naap nefa unufikuan, Mua Maneka Iinan Akena ona profet eliwa-ke, naap nefa maikuan. No ikoka miimep yiena Maneka era eepominan.
77 Era eepomaya os-ke imenarep pina yia iiraromami Mua Maneka wiar ikiwowa era yia ofakowinon.
78 Moram Mua Maneka ona yia kemalep ikoka o sesekeya epa wiimow parina saarik iinan-pa yiar ekapinon.
79 Ne i mua kokoma-pa ikaimik nain ne umowa keker opimik nain parina yiinon. Ikoka os-ke sigar yia opomaya sira eliwa-pa ikaiyen.”
Sekaraiya someka naap awok. 80 Naap ikok muuka nain arimep kema suuwowa eliwa aawep kekanek. Arimep ikiwep epa asia nomon manekiw nan ikua, ikoka wi Isrel mokok epa-pa ariman arinon.